ماوی لاردا قیریقلیق
1 – قارپیز سویو
گئجه ، ساعات ايکی :
حد دن آرتیق گوزلدی . باشقا بیر گوزه لیک . بو ایکینجی دفعه دیر کی بیزیم ایوه گلیب و قیرمیزی کاناپه ده اوتوروب . دوغروسو کاناپه میزین رنگی ماوی ، دولو گئجه ماوی سی دی . اما بو اینکجی کز دیر کی قیرمزی‌یا چونور بو خانمین هر اوتوروشوندا . ایلک کز قاپینی آچماغیمدا ایچه ریه گیریب منی برک و سیک قوجاقلادی و نفس نفس چکره ک کاناپه یه دوغرو چکدی منی و اوردا یوخلادی . بیلمیردیم نی لی یم . آدینی بیلمیردیم . هاردان گلدیگینی . کیم اولدوقونی .آق تنلی ، ترنجی ساچلی ، دوغروسو تام ترنجی دگیل . بیر آز دا ماوی لا قاریشیق .
اشیگده یاغیش یاغیر . یازين وحشی یاغیشی . ايشيق لارين ساری سی سانکی اريير ياغيشين آلتيندا. اوزونه باخیرام . شيرازلی لارا بنزير .سانکی مرلین مونورو ینی دن شیرازین 2100 ایلنده دنیایه گلیب . زيتون رنگلی اوزو . بالی کيمی کوزلری . اوزون کيرپيکلری وار . دوداق لاری چيلک قيرميزی سی . چيلک کيمی قيرمز و شيش . باخیر منه . گولومسور . گولومسه مسینده هیچ شهوت یوق . چوق محبت لی و اوشاق کیمی گولوم سه ییر . ديشلرينين آقليقی باشقا بير آقليق . گز کيمی بير شی . شيرين يعنی . قارپیز سویونی بیله سینه گوتوروب یانیندا اوتورورام
_ بویور خانیم . آل ایچ !
گوزلریمه باخیر . چوق یاواش قارپیزلا دولو اولان بارداقی الیمدن آلیب ایچیر . من ایندیه جان چوق قادین گورموشم چوق قیز لا اشیگه چيق میشام . اما بو اردبیل لی لر دمیشی آلاهی بیر شی دیر . قارپیز سویون ایچر ایچمز ساچلارینین رنگی یاشیله دونور . ساعاتا باخيرام . ايکی دی . يوخو گورمه ديگيمی بيليره م .
_ سن کیمسن آی خانیم ؟
گولور . چوق آق و صفالی اوجا گولور .
_ نیه گولورسن آی خانیم ؟ جن سن ؟ پری سن ؟ کیم سن ؟
جاوابیمی ورمیر . بارداقی الیمه وریب دوروب چکیب گدیر . آرخاسیندان دورب یاواشجا قولونو توتورام
_ دِ کیمسن سن ؟
_ من سی سی ام !
سسی باش گیجه لدیر . سسینی اشیگیدن دگیل ، آغیزیندان دگیل، ایچیمدن دویوب ایشیدیره م .گلجه کدن گیلیر سانکی بو سس.هیچ دویمامیشدیم بله بیر آدی . سی سی . آهونون آناسینا بیز اوشاقلیقدا سی سی خالا دردیک .آدی سيمرغ دی يعنی . آما 30 ایل بوندان قاباقین خاطیره سی دیر او سی سی خانیم . او کیم بو کیم ؟
_ داها چوق دِ اوزوندن سی سی خانیم .
_ تلسمه . قوی بو آشنالیق اوزون سورسون .
گولور.قالیرام . باشیم پیس رنگلده گیج لیر . بیله سینی ایکی ، اوچ گوروره م . نفسلریم آغیرلاشیر . بیر بوشلوق ایچیم ده زوققولدور. پلله لردن اوسته گدیر . ایوی 4 نجی قات دا دیر . اوردا یاشاییر اله بیر . قایدیب اوتورورام . بیلمیره م اونا آشیق اولموشام یا بویله سینه خوشوم گلیب بیله سیندن . بیلمیره م . آنام دمیش کن باشا دوشمورهم بویله بیر ملاقاتی . بیلگیمدن ، حدیمدن داها بویوک بیر شی . اللریم ، قولاریم تیتره ییر و اوشوره م .ماوی کانه په ده اتوروب بوش بارداقا باخیرام . بو بارداقین قارپیز سویونو او خانیم ، سی سی خانیم ایچدی . سانکی ینی دن دلو دور قارپیزدان بو بارداق . یودوم یودوم ایچیره م .
۲ - والنتاين
آديم ساری آت دير . بعضا کيشناماغيما راغما آت لارلا هيچ ايلگی و بنزرليگيم يوخ . آتلار محبتلی و کهانت لی روحا صاحيب ديرلر . بلا و کدرين ايينی بيلرلر. گلمه دن ، اولمادان قاباق اُونئن ايسينی ، قوکوسونو آنلارلار . منسه بلادان سونرا باشيما نه گلديگينی باشا دوشوره م . آدیم آما ساری آت دير . يعنی بو آدلا دوست لاريم چاغيرارلار منی . بو آدی ايلک زرکوب منه قويدی . سرخوش و کیفلی ايدی بو آدی منه وره ر کن . اوندان سونرا هامی منی ساری آت چاغيرديلار. آما کيم ليگيمده کی آديم ۱۹۷۰ لردکی آدلاردان دير . مازيار . آنا آتام منی مازيار سس لرلر . ۳۳ ياشيم وار . چوق دوستوم زاديم يوقدور . ايشته بير زرکوب ، بير دلی چلبی ، دنيز کور ويل و بير ده آهو . پستچی ليق دير گوردوگوم ايش . هر گون سحر ساعات ۸ دن ساعات بشه قدر آق ماشينيم لا تورنس شهرينين گونيينده آداملارين نامه لرينی داشييب پايلاماق دير ايشيم . چوق سوريم بو ايشی . نامه داشيماق گوزه ل ايش دير . من اوزوم نامه آلماقی چوق سوريم . سون زامان لاردا نه آتا آنامدان منه نامه گلر و نه دوستلاريمدان . اليمه يتيشه ن سون نامه سی سی خالادان گلميشدی . آهو نون شاعير اولماسينی يازميشدی . کيم بيليردی او گوزه ليم آهو بير گون شاعير اولاجاق . دايی سينين چوق سوديگی آهو . ايندی نه آهونو شاعير اِتدی حالا بيلميره م . يعنی ۱۲ ايل اولار کی هيچ گورمه ميشم او قيزی . نه ايسه . بو گون هيچ بير ايشيم يوقدور . يعنی بوگون آشيق لار گونو دور . والنتاين . گئچ ميش لرده بويله بوش گونلريمده اتوروب چلبی و يا زرکوبا نامه يازار ديم . گونلوک لريمی يوخولاريمی يازارديم اونلارا . سينما يا گدرديم و يا لوپه آرزيمنديله بابا سينين چيلک باغينا گده رديک . آما ايندی نه نامه يازماقا حاليم وار و نه لوپه سيز سينمايا گتماقا . بو قدر يولو تک ، يالقيز سنديه گو دا لوپه نيين باباسينين باغينا دا سوروب گتمک حاليمدن خارج . هاوتورن خياوانين دا چهره ای رنگينده بير دکان وار . دکانين آدی ايستی پامپوق دور . ايندی بورداييم . ايستی پامبوق دکاننين دا . ياريم ايشيقلی ، قارانليق بير اتاقدا اوزان ميشام . بوردا بويله اتاق لارا قارا کوندالين درلر . ژاپون لی بو کوچوجوک قادين ( لوط دور ) منی او جيقيللی اللريله ماساژ ورماقدا
ـ لوپه يه نه اولدی ساری آت ؟
ـ لوپه ؟ اوه ، او اوچ ايل بوندان قاباق چوق دهشتلی بير وضعيتده دلی اولدو .
ـ دلی می الدو ؟ آنلات بير آز ..
ـ هن ، چيلک باغيندا اوزان ميشدی . اوندان بير آی قاباق ۶ آيليق قيزينی دوشورموشدی . من هيچ بير زامان او سقط اولان اوشاغی گورمه ديم . هيچ بيلمه ديم نه اولدو جسدينه اوشاغين . کدرلی ايدی او گونلر بيزيم عزيزيميز لوپه آرزيمندی . اوزانميشدی چيلک باغين دا و کپنک لره باخيريدی . منده اتورموشدوم باباسی رافائيل آرزيمنديله ايران اکيمين دن، تارلاسيندان دانيشيردوق . رافائيل ۱۹۳۰ لاردا ماهان دا بير آز قالميشدی . اوردا دا بير آجی عشق ياشامينی ياشاميشدی اوز دئديغی کيمی . ماهاانين ۱۹۳۰ گونلرينی بير قوجا مکزيکالينین ديلندن اِشيتماق چوخ ماراقلی ايدی . ذاتا من او گونلر حالا دنيايا گلمه ميشديم کی . رافائيل يانايانا سودیگی قيزدان دييردی کی بيردن لوپه نين چيغيرما ، باغيرماسی گلدی باغدان . قاچديق اونا ساری رافائيل له . چيغيريردی لوپه ، قارا ايلان قارا ايلا ن . قورخموشدو رافائيل . داشی گوتوروب هانی هاردا سوردوم لوپه دن ؟ ساغينی گوستردی . سولونو . هر يره باخديم . قارا مارا ايلان گورمديم . رافائيل ديزی اوستونه چوکموشدی صليب چکيردی و منيم آنلاماديغيم ديلده بير شی لر دييردی . هاردا بو ايلان لوپه سوروشدوم ؟ قارنينی گوستردی . گوزومون قاباغندا سويونوب قارنينی گوستردی . قالديم . نه جور اولار قارا ايلان بير قادينين قارنينا گيره ر . بير شی دمه ديم سانکی بير اسگی زامان لارينين تورنين ديديم سول اليمله آرخاسيندان خيالی بير ايلانی توتوب داشلا باشينی ازديم . گولدی لوپه . اوجا اوجا . آغزی آچيق قالميشدی رافاييل ...
ـ بلکه جادو اولموشدو لوپه ! ايندی هاردادير ؟
ـ لوميتا عقيل خسته خانه سينده . اُوردا ياتير . منی گورنده هپ قيشقيرار قارا ايلانی ..
ـ بلکه ده اوشاق دوشورمه سينده ن بويله خسته له نيب ..
دوکتورلاردا اويله دييرديلر . آما لوپه نين بويوک آناسی لوسيلا بير گون منه دئيدی کی او ايلان لوپه دن اونجه اونون آناسينين قارنين دا ايدی . اونو ديه ندن سونرا منيم بو سول اليم بعضا قارالار . سانکی ايلان اولار ...
ـ راحات اول ساری آت . بويله دليجه کيشنمه !
هن ، دای گده ميره م لوپه نين گوروشونه . هر گئجه او قارا ايلانی يوخودا گوروره م . قورخولو قالين ، بويوک ايشيل دايان قارا ايلانی . آما باشی بم بياض . آق آقباق ! ساری گوزلرله سول اليمه باخار . سانکی سول اليم اونون اوتکی اکيزی دير . نيه اوجور باخير سان منه ..
ژاپونلو قادين داها بير سوز سورمور . دمير . يوزومه باخير . آیا بنزر اوزو وار . سانکی ماوی رنکده اولماق دادير بو يوز . گوزلرينده ايلقينج بير باخيش وار . ياواشجا چيراغی سوندوروب يانيمدا اوزانير . بورا هر دفعه گلنده بو ژاپون لی قادينی ايسته رم . چوق ظريف دير . دارچين ايی وره ر تنی بدنی . رافائيل اولماسايدی بو قادين لا بلکی ائولنيب آلارديم بيله سينی . ائوه گوتوره ر ديم اونو . هيچ ۳۳ ياشيندا تبريزلی کيشی قادين سيز ياشياماز . آما رافائیل نچه لر کز اوستونو آچمادان سوز ايچينده تا لوپه حيات دادير ائولنمه رم ديه تهديد ات ميش منی . ..
ساعات ۱ گنجه اولدو گينه . گينه ده بو ژاپونلی قادينين اُوز ، آدينی بيلمه ديم . دمير . گولور فقط . اوزومه قارا گجه کيمی باخير . چاره سيز ۱۰۰ دلار فاضلادان الينه قويوب اوزوندن اوپوره م
ـ کيشنه مه ، قورخما ساری آت . قورخما يوخودا او ايلانی گورسن سی سی نی چاغير .
سی سی . ايويمه گدر کن سول اليم قارالير سی سی اخوياراق اليمه باخيرام . سی سی . هپ بونو دوشونوره م .
- ۳- نامه
ینه ده آخشام اولدو .لوپه نی دوشونه دوشونه گینه ده یتیشدیم سون ایوین قاباغینا . ساری قاپی سیله ، ساری گول لریله ، ساری تاوانی لا دنیز کوروِلین ایوینه . 7 نجی کوچه یه . گینه ده نامه لرینی قوطویا آتارکن اِشیگه چیخدی . الینده هر زامان کی گیلاسی . ایچنده هر زامانکی خوش مزه لی ،ای لی پینه نوآآ شرابی . آغ تر کوینه گیله . قهوه دری باشماقلاریلا . دارامامیش آغ ساچ لاریلا . اوزون آغ بوغیلا .
_ سلام دنیز !
شرابینی پورتاقال آغاجینین دیبنه دوکور و گوله گوله پورتاقال لاری قوقلویور
_ ساری آت گوزلرین ندن بیله دولو ؟ نیه ایشیلدیر ؟
_ لوپه نی دوشونوردوم . هی یوزو گورونور ایچیمده . دانیشیر منیمله . آما دوداقلاری بله توهاف شکیلده قارا ...
_ ساری آت چوخ دوشونمه . لوپه نی آرتیق اونوت !
_ بو نامه نی ورمه یه گلدیم .
_ آچ اوخو گوروم نه یازیبدی منه عزراییل !
_ هاردان بیلیرسن عزراییل دن دیر آی کیشی ؟
_ اوزاتما . گل ایچری آچ اُخو او اُلوم مکتوبونو !
ایچری یه گیریب هر زامان کی سودیگیم یرده اتورورام . پنجره یه دوغرو اولان کاناپه ده . بو ایودن همیشه یاس قوخوسو گلر . ایران یاسی . هیچ بیر یرینده آما یاس چیچگینی گوره مره م . سوینره م بوردا اولماقدان ، اوتورماقدان . چوق راحات وریجی بیر ایو . دنیزین اوغلو قیزی یوق . هی دیه ر من اولن دن سونرا گل بو ایوی وریم سنه !
_نه ایچرسین ساری آت ؟
_ نه وارسا .
_ نه وارسا . اُلور . گل سنه بو گوزه لیم تکیلانی آچیم . آما لوموسوز ، مزه سیز ایچه جاقسین ها . بو تکیلا هر جایی قیزلار کیمین دگیل . چوخ قیسقانچ و پخیل دیر . تک اوزونو .
_ گولدورمه منی آی قوجا دنیز . ور ایچیم .
_ یوخ. سول الینله یوخ . ساغ الینله .
سول الیمه باخیرام . حیس سیز . اشیگده یاغیش یاغماقا باشلیر . پنجره یاریم چیلیق آچیق . ایچقی نی آلیرام . اتورور یره دنیز. دنیزده ن باشقا هیچ بیر آغ آمریکالی نی یره اتورار کن گورمه دیم حیاتیمدا . اتاقی کیتابلارلا دُولو . هر دیلده . عرب دیلینده . فرانسا دیلینده . حتی چین دیلینده بِله کیتابی وار اُنون . ایران ادبیاتینا عاشیق . بعضنده قارشیدیرار ادبیاتی . مثلا شیرازلی حافیظین شعرلرینی سانکی سومر ادبیاتینا عایید دیر منه اخور و سونرا گوزلریمین ایچینده حیرت آختارار . وِترنر ایدی اسگی دن . آما نچه ایلدیر امکلی اولموش . یولداشی گِچن ایل الدو . قارا ساچلی بیر قادین دی . هاردا قویلادیقینی و یا اُلوسویله نی نه ییپ کیمه دییب سویله مه دی . آغلاماسینی بله گورمه دیم . هر جومه توتار بو یخه می و منی ایچری آلار . هر جومه بیر نامه اُخوتار منه . گچن جومه نامه سی بیر بالیق دان گلمیشدی هندوستان طرفلرینده . ایندیسه دییر اُولومون نامه سی دیر .
_ سِودین می ایچیقی نی ؟
_ چوخ زولال . چوخ ایستی .
_ دوز بیرین داها دوکوم .
_ یاشاما !
_ یاشاما !
_ دای آچ اوخو !
آچیرام . نامه پاکاتینین اوستونده گوندره نیین یازی سی زادی یوخ . کاغاذا باخیرام . زعفران رنگینده بیر آهو شکیلی چکیلیب یازیلار لا . اُزونه گوستریرم . ماوی گوزلری گولور دنیز کوروِلین . شرابینا تکیلا دوکو ر. بوغلاری گیلاسین ایچنده اوزور .
_ اُخو ساری آت . اُخو . آما ساغ الینده توت اُخو اُنو
یاغیش امان سیز وحشی جه یاغیر . اوزونه باخیب اُخورام نامه نی :
عزیزیم ، دوستوم دنیز . دون گنجه گله جکدیم یانینا . پیچاقالاریمی ، یِِل لریمی ایتیت میشدیم بوینوا. باغیشلا کی سنین گوزلرینی گئجه بویونجا یولدا قویدم . بیلیره م دُولو قارین ایچمیشدین . بیلیرم آرزیلامیشدین اولومونون اوتکی گونو یاغیش یاغسین . باخ ایندی بو نامه نی ساری آت اوخور کن یاغیش بله دریا دریا یاغیر .گل مه دیم گله مه دیم . گوزوم دوشدی بیر قیزین آیناسینا . کیمسه یه بنزه مین بیر قیزیدی . یانینداییم ایندی او قیزین . گولور او قیز . بیر قارپیز بوستانیندا اتوروب گولور .بو دیدیگیم پیچاقلا اونا هی قارپیز کسیب سونورام . هانی درلر الومون کونولو اولماز یا . گورورسن کی یالان دی . بو قیزا ورولموش کیمیسی اولموشام دنیز . سانکی بودا منیم اولومومون ملکیدیر . دیدیم بیله سینه بیر دور گدیم گلیم . اولماز دئدی . دنیز دوستوم آرتیق اوزونه باشقا بیر اولوم تانریسینی تاپمان لازیم . من بو تزلیکده اورا گله مه م . بو نامه نی اوخویانا دا بیر سوزوم وار . سایقی لی ساری آت یری گویه گتیره سن گویو یره بو آندا بیر اوجا بنادان لوپنین یره دوشمه سینین قاباغینی آلامازسین ... اُ ... دیب ... یولو ... نلیق ... اُپدوم ... .
دوشدو یره نامه الیمدن . دنیز اغلیا آغلیا گولوردو . پنجره دن آتیلیب ماشینما مینیب لومیتا خسته خانه سینه طرف سورماآ باشلادیم . سول الیم حس سیزی دی . آینادا گئجه قیرمیزی تولکی کیمی باغیریردی یانیردی .سرعت ایچنده باشیم آغاریردی !
- ۴- قیرمیزی گول لر
هانی بعضا بو کارتون دوزه لدن لرین چیزقی یازقی لارینا باخسان 3 بویوتلو ماوی چیزقی لرله بیر شکلی گورورسون . منده ایندی اونا تای بیر شی اولماق داییم . 3 بویوت لو ماوی دامارلارلا . جان سیز بیر ماوی مدادلا چیزیلمیش بوشلوقدا . روح سوز تانری سیز بیر هئچ ! هاوا دا هیچ اسینتی یوق . ساکیت و سوسقونلوق . آی هر زامانکی آی اما سانکی ساری یا بیاض دگیل بلکی اولو سونموش قیرمیزی و هاوا قورو هاوا دورقون . يتيشميشم. سرعتدن سوکوگ سرعتندن چوکموش. لومیتا عقیل خسته خانه سینین 17 نجی قاتینا باخیرام . هانی لوپه م منيم ؟ هاردا ؟ هاردان دوشور ایندی هارا دوشور لوپم منیم . هانی هاردادیر بو دوشوشو ؟ آچ ، دلی قوردلار کیمی اورا بورا باخیرام . لوپه نین ایسینی عطرینی آختاریرام .ایلیه ایلیه اونون دوشدوگو یری و زامانی تاپماغا چالیشیرام . تاپامیرام . دونوره م . گوزومون قاباغیندا بیر تابوتی قارا ماشینا سوخورلار . یتیم پیشیک لر کیمی مله ماق گلیر ایچیمدن . ملی ییره م . هیچ بیر خبر . سوراق یوخ لوپمدن . هانی او قارا سوقوط ؟ او دوشوشو منه نیشان ورین او دوشوشو تا من ایچیمده کی کوفله نن قالان تانرینی توتوم بوغوم . بیر نشان ساده جه ! یوخ ایله بیر نیشان . قاپینی آچیب ایچه ریه دالیرام . اولو آدام لار کيمی سانکی قارا يوخودان دوروب يری يير کن يری ييره م . اوزومو گورمدن بيليره م يوزومون گووؤرمه سينی . قورباغایا بنزیه ن بیر قادین اوتوروبدی سالن داکی میزین آرخاسیندا آغ پالتارلا .
_ لوپه نین جسدی هاردادیر ؟
_ هانکی لوپه ؟
_ هانکی سی ؟ لوپه آرزیمندی !
_ هانکی لوپه آرزیمندی ؟
_ نه دییرسینیز آی خانیم ؟ مگر بوردا نچه دانه لوپه آرزیمندی وار کی ؟
_ هر قات دا ان آز 15 دانه لوپه وار ؟
قالیرام . بو کیمدی ؟ اولو يووان می ، اولو گومن می ،اولو يی ين می ؟ گولور . دیلینی چیخاردیر . دیلی تام قورباغا دیلی کیمین دیر .
_ سن کیمسن ؟
_ منده لوپه آرزیمندی یم !
دای جاوابینی ورمیرم . بلکی بورانین خسته لریندن بیریسی اولا . میزین ساغیندان آسانسورا دوغرو گدیرم . دوگمه نی باسیب گوزلیرم . گلمیر آچیلمیر قاپی . آسانسور 17 نجی قات دان آشاغی یا گلمیر . ینی دن دونوب پله لره ساری گدریرم . قورباغایا بنزیه قادین دا دالیمجان قاچیر
_ دایان دور، دور ، منده لوپه یم !
پله لردن ایشیق کیمی یوخاریا گدیره م . 17 نجی قاتا . سویوق و دنج بیر قات . چیچک ایسیله دولو . گیجه لدیریجی بیر عطر . بير آن دورورام . ندن هر شی بويله شکيل سيز . سانکی هر شييين او دوغرودان رنگی ، بوياسی يووولموش . کت ميش . من هاردايام . اولوخانادا می ؟ آنا قارنيندا می ؟ مورکب جوهر ايچينده می ؟ زامانينی اشگينده می ؟ باشيم دونور تانريم . بير سوز سويله . لوپه نین اوتاقی ایشته اوراسی . قاپی سینداکی نومارا سانکی کیچیلیب بویور . 714 . دیپ دن نفس چکیرم . حاضیرلیرام اوزومو . هانی اوشاق لار قورخارکن آنالارینی هی چاغیرارلاریا ، منده آنامین آدینی یاواش یاواش دییره م . سونا سونا درکن یاواش یاواش یاواش یاواش یاواش یاواش یاواش یاواش قاپینی آچیرام لوپه نین سوقوطونا .... اوتاق قیپ قیرمیزی وحشی ، عجاییب گول لرله دولو . ایچی ساری یاپراقلاری قیرمیزی ، فیل خورطومونا بنزیه ن گول لرله . گوزلریم آچیق اما حالا بیر شی گوره م میرم لوپه یه گورا . هانی او کارتونچولارين ايشلرينده سوز ات ديم يا . سانکی اونلارين او ۳ بويوت لو چيزقی لری ايندی حرکت تاپميش . جان لانميش لار . آما هانگی زامانين هانگی شهرين ايچينده ، قايداسيندا ؟ اونو بيلميرهم . سانکی ارخامدان او قورباغایا بنزیه ن قادین دا ایچری یه گیرمیش. دونورم آرخاما باخیرام . اونون گولمک سسی گلیر آما یوزو گورونمور . ایستیره م بیر شی دیه یم آما ... سانکی گول لر خورطوملارینین اوجلارینی اوزومه سورتورلر . قولاق لاریمی اوخشور لار . قورخماق کيمی بير شی اياقلاريمی سويوتور . سونام آنام در کن بعضا او ايچينده کی تانرينين آدينی سوديگين قادينين آديلا قاريشار ديلينده . یاواشجا تا او ايچ درین لردن ، چوق درینلریمدن لوپه لوپه دیه اوشاق کیمی آغلاییرام .
_ ساری آت سنه نولوبدی ؟
سانکی ايلک کز دير قولاغيمی قولانماق و سس اشيت مک . بو سس ! آنامین سسی می ؟ لوپه نین می ؟ لوپه تورکی بیلمزکی . یا سی سی نین می ؟ سی سی بوردا نه ایشی اولا بیلر کی ؟ او يالنيزجا بويوتسوز شهرلرده ياشار ، گزر . آهونون مو ؟ یوق . باخماغا چالیشیرام . ياندان باخيرام . کيشنه ماغيم گلير . قاباغیمداکی اوزانان قادینی گورورم اما تانیا بیلمیرم . بیلیره م یانی بو لوپه نین تا اوزو دور آما ...
_گل ساری آت . کیشنمه . گل یانیمدا اوتور ای ..
اوتورورام . باخیرام .
_ لوپه ؟ نیه گولورسن ؟
_ نیه منه اویله باخیرسان آخی ؟
_ لوپم ده گوروم سن چوغالمیسان یا منیم گوزلریم یوزومده آرتیب ؟
_ گولدورمه منی آی ایرانلی ساری آت . گل گیر قوینوما . یورقان آلتی ایستی دیر .
_ سن کیمسن ؟
_ منم !
_ به نیه تورکی ... هاردان تورکی دانیشیرسان ؟
_ بیلمیرم . آما سویندیره ر مطلق سنی منیم دیل آچمام .
_ ساعات نچه دی ؟
_ ....
_ پ.... ؟
_ نیه ال لرین بویله آغیرلانمیش آی ساری آت ؟ ات دن مه میسن کیشی اما پک آغیرلامیشسان . سنی چوق اوزله دیم . تز اولو سویون گیر قوینوما دئدیم سنه .
_ نیه سویونوم آی قیز آخی . بو گول لر نه یین نه سی ؟
_ اونلاری او قورباغا خانیم بورایا گتیریب . آدی آج گول دورلر . منیم کیمی . قیرمیزیا آج دیرلار .
_ سن نیه بویله ماوی اولوبسان ؟
_ قیرمیزی دوداق لی ماوی ...
_ لوپه ... لوپه ... بو قورباغا دئدگین قادین ایندی منیمله گیردی اوتاغا ...
_ گوزلرینی یوم ساری آت . گوزلرینی یوم ..
_ بو قورباغا دئدیگین خانیم ..
_او سی سینین اکیزی دی . منیم دوستوم . آما دمیشدیم سنه گوسترمه سین اوزونو . یوم گوزلرینی .
یومورام گوزلریمی . سویشی شیروق بیر بیرمیزله .سانکی دوزلو ، خام قوزو جیگری دیر لوپه نین آغزیمدا دوداقلاری و قولاق لاریم گولرلرین آغزیندا و ویلون سسی .
_ لوپه کیم بوردا ویلون چالیر ؟
_ قورباغا خانیم
ایچیم ایچیمی یی ییر. لوپه نین تنی سانکی قیزلدان سامان کیمی بیر شی . ظریف ، یونگول و ایشیقلی . مین دانه گوزله ، یوق ، سانکی مین لر گوزله اونا باخیرام. ماوی یوزده قیرمیزی دوداقالار . باللی گوزلر. ویلون سسی منی یاغیش کیمین یاغدیریر اونونون ماوی وارلیغینا. ایچیمده هر زامان بیر ایستک واریدی . ایستردیم منی سوگیلیم له سوشیر کن بیری یانیمدا اولسون و سیر ات سین بو چلیشگینی . اولسون و گورسون منیم ایلان اولمامی . گینه بویله بیر تمنا ایچیمده اویانیر . باشیم دولانیر ایلانلاشماغیمدا. قورباغا فادین قیرمزی گوزلریله گولور منه و یانیندا بیردن قیرمیزی گول لرین بیریسی یاواش یاواش یاواش یاواش دونوشور زر ...
_ لوپه باخ ، زرکوب دا بوردا بیزه باخیر
_ دلیرمه ساری آت .
گولور لوپه . گولمه سی بو قیرمیزی ساق قالی ، گوزلوقلو زرکوبون آغزینی ، قارا آغزینی گولمک له دولدورور. الینده بیر کاغاذ وار زرکوبون . بارماغینی آغزیندا قارالدیر و دفترینده بیر شی لر یازیر .
_ سن بوردا نی نیر سن ؟ نیه ساچلارین یانیر آی زرکوب افندی ؟
جاواب ورمیر یازیر کاغاذلارینی باخا باخا بیزه ..
_ هیچ فیکریمه گلمزدی کی زرکوب بیزلردن اولمایا .
_ یوم گوزلرینی ارکه گیم .
یومورام گینه گوزلریمی .
_ سنه بیر گونش پارچاسی ماوی تن لی قیز دوغاجام ای ساری آت !
گولمه م گلیر ایچیمدن . سوموک لریم ، ساچلاریم، دامارلاریم ، بارماقلاریم ، دیشلریم ، یارالاریم، یوخولاریم هپ برابر گولورلر. بو ویولون سسی آغیر ایچقی کیمی اتقی له میش منی . آچیرام گوزلریمی . بیر کاغاذدا قیرمیزی بیر گولون آغزیندا ییلیره م یی لیره م لوپه . یی یی لی ره م . زرکوب قورباغا خانیمین دوداقالرینی دوزلو خام ، قارا جیگر کیمی یه ماقدادیر .
_ قارا ایلان ، قارا ایلان ...
چیغیردی لوپه . همشیره لر اوتاغا گیردیلر . اوتاغین ایشیغی یانار کن قورباغا خانیملا زرکوب گولرله هپ برابر یوخی وردیلر .
_ ساری آت سیز اذن سیز بو اتاغا گیره مز سینیز !
_ باغیشلایین . دوغروسو ...
الیمدن توتدو همشیره نین بیریسی و اوتاقدان چیخاردی منی ..
۵ - قورو کپنک
دسه لر اگر منه بیر گون بو دوستون زرکوب ، بو اندر گوزه لیم تنها دوستوم ، 6 برماقلی بیر خوخانین تکی دیر .. یا همین دون گئجه بیریسینی یازدیقلاری ایون لار ایچین اولدوردو .. یا نه بیلیم اوزونو ماهانین یاغیشینین آلتیندا دارا آسدی .. دوغروسو بیر طورلو اینانیریم . یعنی او اویون چو ، کلمه لر قوجاسی ، جن لر پادشاهیندان بویله شی لری اینانیرام . مومکون دور بویله اولای لار اولا . احتیمالی وار چوقراق . اما بیزیم بو جن لر پادشاهی بو ، بو زرکوب ، بو قیرنانین تا اوزو بیردن اویله سینه لوپه نین اوتاغیندا جیق دیه تاپیلی وره و هله او شکلیده ، ظاهیرده ... یوخ .. توف توف ... باخ بونو دای اینان مارام . یعنی بینیمه گیرمز . بو زرکوب او زرکوب اولاماز . بو اشده کسین بیر یالان بیر دولان لیق وار . نه طه هر آخی بو زرکوب او دیابلو گول لرین دونوشمه سی اولا بیلیر . په آتانا . نه بیلیم دوستوم ؟ نه بیلیم ! من او زرکوبو تا اوشاقلیغیندان تا اینقه ببه اولماسیندان تانیرام . تا سی سی خالانین تا قاوال اوتاغیندان . اوترار دوق سی سی خالانین اویوینده . من ، آهو و او آدی باتمیش اینک چلبی . باخاردوق حسرت له زرکوبون دیرناغینین آتشینه او کیچیک تارین سیملرینده . چالار دی سی سی خالا آی ایشغیندا ماهنی نی چالاردی بو زرکوب . بیر محله نین اوشاغی دوق بابا . واراژین پیشتان اوشاقلاری . حتی بونو دییم دوستوم منله بو ایری بورکلو زرکوب دیدیگیم خوخان افندی برابر بیر مدرسه یه بیر اوکولا گدر دیک . یان یانا اتوراردوق . او اوجا آریخ آغاج کیمی بیر بوی . منسه قیسا باریت کیمی بیر اوت بیر قیرنا بیر آتش . او سس سیز درین درین باخان حتی بوشلوغا قولاق آسان . منسه چوق دانیشان و چوق گولن . آما ایندی چوق اووووووه ... هن .. ماراخلی بیر شی یادیما گلیر . باخ .. من آهونو سوردیم او اوشاق جاسی رویالاریمدا گیزلی گیزلین بیر دلی قانلی سوداسی دآآآآ ..او سا آهونون باجی سینی همانی . ایندی یادیما دوشور بو خاطیره لر . هوما کمانچا چالاردی . دونیایا باخ . ایندی که بویدوق داغ گوردوق تپه گوردوق منیم خیالی سمی زهریله دولو اولان عشقیم سودامین آدی سی سی دیر و بیزیم بو ایری بورکلو زرکوب آقا اونون باجی سی قورباغا خانیما ورقون . قورباغا خانیم .. آدا باخ .. پیشمیش اردگین گولماغی گلیر بو آددان . تام بیرزیم گوزوموزون اونونده ، با غ بیر ناغیل دمیره م ها تا بیز چیریل چیپلاق سویشیرکن بو داینا ، بو ایری بویلو آغاج او قورباغ .... غ ... غا خانیم لا چیریل چیقلاق سویشیردی لوپه نین اوداسیندا . گوزومله بونو گوردوم . دییرهم و اما دوستوم اینانامام . باشیما گیرمز یعنی . بو ایشده بیر کلک وار . گره بونو تاپام آختارام . چیزم چوزه م بو دایابولوس رویانی . چوخداندی بیله سینی گورمه میشم . اوزله میشم او تارچی هوما ورقونو زرکوبو . سون خبریم سوراغیم بیله سیندن منه یازدیغی نامه یدی . .. نامه ؟ .. او نامه نی بیر کره هیچ بیر زامان اوخومادیم . یعنی قورخدوم منه هومانین اولمه سینی یا بیر پیس خبر وره . و یا نه بیلیم قورخدوم مندن پول ایسته یه . یوخوم دیه مم من اونا . ایندی او نامه سی هاردا ؟ لوپه اونلاری ایوین هاراسیندا قویوب گیزله دیب . ذاتا لویه بیزیم الیفبامیزدان قورخاردی . گوره ر کن خاچ چکردی . کاشکی بیله یدیم هاردا اولماسینی . آما اونون سوراقینی آنجاق ایکی نفردن آلا بیللم . گوزه لیم آهو و یا چلبی اینکلری . چلیبی دیدیگیم آدام نچه ایل لر اولار کی صبا شهرینده یاشیر . وان ارمنی لر کوردلر گوزل لرین شهری تا شنجاانین مرزینین اشگینده . گره اونا تلیفن ادم . اما کاشکی ایوده اولسون و کیفلی سرخوش اولماسین .
_ الو .. الو .. منم چلبی .. مازیار ..
_ او .. مازیاریم ... ساری آتیم منیم . دونیانین ان وفاسیزی یاغیشی ..
_ یات میشدین ؟
_ هن . اوزانمیشدیم ساری . لوپه نی لیر ؟
_ لوپه ؟ او ه .. واردا ... باخ .. سندن بیر ..
_ عجب اتدین کی زنگ ووردون .. ساری آت دون گئجه یوخوووی گوروردم ..
_ یوخومو ؟ نه جور گوردون ؟ اینشالله کی خیر اولا ..
_بیلمیره م . دوغروسو هم گولملی هم ده قورخمالی .. هن هن گولملی ..
_ بابا ده گوراخ ..
_ باخ بیر پک یادیما گلمیر ایندی . آما .. هن .. اله بیر گلمیشدیز بیزه . یانی بورا و بیزیم ایویمیزه. سن ، آهو ، دیزبادانا .. هن سی سی خالا .. هوما دا واریدی . باخ لوتودوز . چیریل چیپلاق . بیزیم قوناق اودامیزدا ناماز قیلیردیز. دوغردان دییرم . هن ایندی یادیما گلیر . آما نامازی عربی دیلنده دگول . سانکی اوخویا اوخویا . سی سی خالانین اوخوماسی کیمین . قاباغیزدا او زرکوب دوستوموز اوت ، آتش کیمین یانا یانا امام لیق الیردی . هن قیرمیزی اوت کیمین . بیلی سن . قورخمالی دی ..
_ به سن نی لیردین ؟
_ من ؟ من نی لیردیم ؟! منده پنجره دن سیزه باخیردیم ...
_ باخ گوروم دیزبادانا دیدین ؟ او کیمدی ؟
_شاعیر نه تز اونودون هامینی ؟
_ هیچ بیله بیر آدی خاطیرلامیرام آی چلبی
_ بابا دیزبادا نا دا ... او جیق قیلی پیانو موعلیمی . ساچی آغ یوزو چوهره ای خانیم . هانی بالیق آلاردوق اونا .. اوتاردی او بالیق لاری او خانیم ..
_ هن .. دیزبادانا .. هن ..
_ گده قوجالمیسان اله بیر .
_ باخ گوروم آی چلبی بو زرکوب دیدیگین هاردا ایندی ؟
_ سون بیلدیگیمه گورا ماهاندا ؟ نجه ؟
_ نی لیر او ماهاندا ؟
_ قوش جو توکانی وار . قوش ساتیر ..
_ اوه قوش جو زرکوب ..
_ هن یادیندا ؟ .. شاماردا هر هانگی قوشا باخاردی قوش اونون چیگنینه قوناردی . یادیندا ؟
_ یوخ ..
_ بابا سن کیسن آخی . هر شی اونودون گدین آی کیشی .
_ گیجه لمیشم دوغروسو آی اینک ..
_ هله نیه اونو سوروشوسان ساری آت ؟
_ دوستوم سنه گه بیر زحمت وریم من . اونون او آدرسینی منه تاپ . موهوم ایشیم وار بیله سیله . یا منیم تیلفن نوماره می وره اونا ..
_ گده چوغ یورقون دانیشی سان . سنه نه اولوبدی .. لوپه نیلیر ؟
_ لوپه ؟ لوپه دلی اولوب آی اینک .
_دلی می ؟ نه جور یانی ؟
_ سوروشما . ایندی دیه مم .
_ آهان .. هن . نه دییم .. پکی نیه به هیچ نامه زاد یازمیرسان آداما . آخی دوستلوق بیله اولار ؟
_ باغیشلا دوستوم . باشیم بیر آز شولوق دوغروسو .. حالسیزام ..
_ نیه ؟ نولوبدی ؟
_ اوتور بابا . سن ده گوراخ سن نه ایشلر گورور سن اورالاردا ؟ بو قدر ایلدن سونرا سن قوجا کورد اولدن یا یوق ؟
_ هن بابا . ایولندیم اولدوم . کورد گوه جی کورد قادینی منی کورد اله دی .
_ آی اینک چلبی کاشکی بوردا اولادین .. خانیمی وین آدی نه دی ؟
_ ساقی دیر . ساقی . منده ایستردیم اوردا یانوا گله م آی دوستوم . آما اورایا گلیب یت مک پول پارا ایستر.
_ زرکوب نجه ؟ او ایولن دی می ؟
_ هن بابا هومایلا ایولن دی . سونرا بوشاندیلار . دییر لر زرکوبون ینی قیز دوستو بیر قورباغا دی .
_ قورباغا می ؟
_ هن گول مه لی . بیزیم ساقی آهو دا اشیت میش .
_ آهو هاردادی ایندی ؟
_ یاشادیغین شهرده . گور نا واختی اورا داشنیبلار ؟
_ عجب ..
_ آما آدرسینی بیلمیرم . ایکی ایل قاباق داشیندیلار اورایا . یانی دایی سی اولن دن سونرا .
_ پ ؟ اولدو مو اونو ن او سولیمان دایی سی ؟
_ هن . اوزونو اولدوردو .
_ گده اله گورکملی آدام نجه اوزونو اولدوره ر ؟
_ نه بیلیم . واراژین یاغیشین آلتیندا جسدینی تاپدیلار . حاجی لک لک دیره گیندن آسمییشدی اوزونو .. بعضی لری ده دییر لر باشقا آداملارین اللر ی وار اونون اولومونده ..
_ عجب ..
_ هن دوستوم .. گونلو قاراتما ایندی .. قارالار کونلون ..
_ نه دیییم ؟
_ دای من گت مه لی یم بورانین خوروسلاری بانلادیلار .
_ نه خوروسلاری ؟
_ دوستلاریم . قیرمیزی تاجلی دوست لاریم .
_ سنده دلی اولدون سونوندا ... ساقی نی اوپ بیزیم طرفیمزدن .
سس کسیلدی . بیلمیرم نه اولوبدی منه و منیم دوست لاریما . یانی بو ایندی کی منه . دوست لاریم یا اولورلر یا دلی اولورلار . بیریسی خوروسلارلا دوستلوق ادیر . اوته سی قوش دوکانی آچیر ، قورباغا خانیملا یاتیر دورور. و من ساری آت بو سی سی تاپیلان بو پری دن سونرا حیاتیم ایری بوروق اولدو .. هی جبلی قوم قوم .. نه بیلیم آخی . بلکی بویله شی لر یوخ . بلکی یوخو گورورم . بلکی او دوراداکی او قورو کپنک منم . بلکی اولمیشم و بونلار توستولن ن یانان رویالاردیر اولوموم دن آردا قالان . گره سی سی نی گده م تاپام . آچار اودو ر . قیفیل دا اودور !
دون گئجه !
گینه ده دنیزین ائوی؟ دنیزین ایوی . هازامان بورا گلدیم . الیم گینه تیتره ییر . نامه سیز سوز سوز اوتورموشام . الینده اسگی باسیملیش فارسی دیلینده حافیظین دیوانی .دوواردا گنجلیق عکسی بیر موتورون اوستونده . بوردا نی لیره م من ؟ نیاران ، رنگی آتمیش یوزومه باخیر . دنیزین جثه سی چوخ بویوک دی . باشی سانکی دولو قیرمیزی گون دور. او گوزلریله اوزومه باخیر .. بعضا ده باشینی قاشییر .
_ الین گینه تیتره ییر ؟
_ دای آلیشمیشام دنیز .. نیه نیاران سان ..
_ سنه نیارانام . سانکی بیر شی لر اولوبدو بیله وه .
_ نجه یانی ؟
_ آخی همیشه بیزه تک گلر دین
_ بیه ایندی تک دگیلم ؟
یاواش جا گولوموسور . آغ ایمپورت تکیلادان لیوانیما دوکوب یاواشجا ایاغا قالخیب یاتاق اوداسینین قاپی سینی آچیر . آینادا بیر چیپلاق قادین یاتاق دا گورونور . گونش اوزرینه باتیبدی .
_ دنیز او کیمدی ؟ موزاحیم اولمیام سنه ؟
_ بونو گره سندن سورام او کیمدی ؟ نیه منیم ایویمه گتیرمیسن بو قادینی ؟
_ نه دییر سن ؟
_ گجه سرخوش گلدیز بیزه . او قادینی اوردا یاتیدین اوزونده او کاناپه ده یاتدین ..
_ گئجه می ؟ هانسی گجه ؟ نه سرحوشی ؟
_ گیجه لمیسن ساری آت . لوپه نین اولوموندن سونرا گیجه لمیسن
_ نه دییر سن ای کیشی ؟ لوپه نه زامان اولدی کی ؟
_ 40 گون اونجه . هانی منیم ایویم ده یدی یا . هانی منه او نامه نی اوخودون یا ..
_ آما لوپه اول مه میشدی کی . اونون لا سویشدیم بیله ..
_ ایندی بو قادین کیمدی ؟
_ نه بیلیم آی کیشی .
ایاغا قالخیب قادینا دوغرو گدیره م . اوزونه باخیرام . اینانا میرام . او ژاپونلو قادین . قارا کوندالین اوتاغینین قیزی . بو بوردا نی لیر . دنیز اوزمه باخیر . یاواشجا قادینین یانیدا اوتورورام . الیمی یوزونه چکیب اویان اویان دییره م . آچیر قارا گوزلرینی . یوزومه باخیر . دنیز قیزین پالتارلارینی الیمه وریر و اوتاقدان گدیر . قیز دوروب اوتورب پالتارلارینی گییر .
_ سن بوردا نی لی سن ؟
_ منی سن بورا گتیر دین آی ساری آت .
_ نی بورا .
_ نه بیلیم . ایچمیشدین . منی بورا گتیریب منیمله تانگو اویاندین .
_ من آما هیچ تانگو بیلمم کی .
_ سن نچه نفرسن آی ساری آت ؟
_ آنلامیرام نه دییر سن ؟
_ سن تانگو اویونونون اوستادی سان . دون گجه ایچدین ایچیدین منی بوردا اوینادوق .
قالیرام . دنیز پورتاغال سویولا ایچری گیریب قیزا ساری گلیر . قیز ایچر کن گوز لریمی یومورام . یاواشجا گوز یاشلاری یوزومو ایسلادیر .
_ لوپه نه زامان اولدی دنیز ؟
_ 40 گون اونجه .
_ نه جور اولدو ؟
_ اوزونو جامدان آتمیش .
_ من او زامان هاردایدیم .
ژاپونلی قیز یوزومو یاواشجا سیلیر .
_ سن آهو آدیندا بیر خانیمین ایوین ده یدین .
آهو. هیچ یادیما گلمیر . نجه یانی 40 گون قاباق منیم بیر دانه یولداشیم ، قادینیم لوپه آرزیمندی اوله و من بو گچن 40 گونو خاطیرلامایام . نه ییم من ؟ آغاج می داش می یام ؟
_ هاردا قویلادیلار لوپه می ؟
_ قویلا مادیلار . تیاوانایا گوتوردولر . قارتال لارا وردیلر ...
_ تیاوانایا می ؟ سن هاردان بیلیرسن آی دنیز ؟
_ منی ده آپاردیز اورایا ..
_ اصلا اینان میرام دیدیکلرینیزی . سانکی بونلارین هامیسی یوخو کیمین بیر شی . یا بیر طور جادویی اویون .
_ اوزان سنی ماساژ وریم ساری آت .
_ کیشنه مه ساری ...
اوزانیرام . اوشاق کیمی اوزانیرام . مریض بیر اوشاق کیمی و تسلیم . هانی منیم دامارلاریم ؟ هانی منیم سسیم ؟ هانی منیم او همیشه کی شککیم ؟ من کیمم ؟ هانکی او باغریشیم ؟ هانی او بیردن دونمم قالخمام . هانی او عقلیم. هانی ندن چیغیرمیرام لوپه نین آدینی .هاردا ایتیر سسیم . هانگی بوشلوقدا ؟ قادین ماساژ وریر منی . بارماقلاری سانکی پیانو چالیر قادینین. قادینلار اولماسایدی بو دنیا نی نیلردیم من ؟ دنیز بیلمیرم کیمین پریلودونو آچیب یاواشجا اویانییر . منه نه اولور . دنیزین یوزو ایکی له شیر . اوچ له شیر . دنیزین یوزودونوشور عمی مین یوزونه . اوزون بوغلاریلا . فر ساچلاریلا . من کیمم ؟ من ساری آت دگیلیم . من مازیار دگیلم . من .. من بیر اوجا بویولو ایچی بوش بیر سیلندیرم .آکروبات سیلندری. ایندی ایچیمده دنیز موتورونون اوستونده اوتوروب آغیزی دولو تکیلایلا ایچیمده موتورونو سورور . تا باشیمدا ژاپونولی قادین ، آهو ، زرکوب اوتوربلار دنیزه باخیلار . من قوجا توز توتموش بیر سیلنیره م . بیر چولون آراسیندا . گویه باخان بیر سیلندیر . قارتال لارا باخان بیر سیلندیر . 7 قارتال لارا . سانکی شوپن دیر هر گون باخان او یددی قارتالا و ... 7 هامیا یاخچی بیر سایی دی . منه آما ... لوپه یه باخان بیر سیلندیره م . دنیز سورور موتورونو . دورت دورومده . ایچ ایچمده سورور . بیلمزدیم بو قدر سوریم موتور سسینی . موتور سورولمه سینی ایچیمده . بو هاوا ییترماسینی . بو بوشلوغو سرعتله بو وحشی ، دلی سرعتله دولدورماسینی . آهو اما دنیزه باخمیر . منه باخیر . بوتون منه . آهو ندن منه باخیر ؟ منده نه یی آختاریر. او اوشاق آهو . او دایی سینین گیله سی آهو . بو قدر قادین و قادین لارین قادینی او سو روحو سی سی . آما لوپه م . او نجور اوچدی . مگر اونو من تاپمادیم . نجور چیرگین اولومون سوزونو ایناندی لوپه ؟ هاردا زویدو ایغی هانگی قاردا کی علاججسیز اولمه سیغیندی ؟ مگر مینیم بوینوم قیریلمیشمیدی ؟ مگر او دلی گول لرین آراسیندا سویشمه دیم اونون لا . مگر زرکوب .. یوخ من بو قوجا توز توتموش گویه باخان آکروبات سینلدیری یم . دنیز دوردورو موتورونو و پول پارا یاغیشنا بورکونو الینه آلیر .. بس منیم روح انگیز آنام هاردا ؟ او نیه دای گلمیر رویالاریما . بلکه بیر سیلندیر دوغماسیندان اوتانیر . اما انا اوز دوغماسیندان اوتان ماز کی .یا آتام ؟ هانی او چاپدیران سروی بویلو آتام . او باللی باخیشلی آتام . .. دون گئچه هپ سنین زولفوون سوزی دی ... گئجه نین تا اورتاسینا دک ساچلاریوین وصفی ..
دنیز حافیظ اوخور گینه . ژاپونلو قادین گت میش .
- ساری دور گت .
- نیه ؟
_ ینی تاپدیغیم اولوم ایندی ایومیه گله جک . گره گدهم یوونام . گره بوردا مندن سونرا هیچ کیسمه اولمایا .
_ دلیر مه دنیز . دلیرمه..
_ دور گت ددیم .
ددیم یا . عمیمه بنزیر بو دنیز . زامان عمی . اولموش مو یاشییر می . بیلمیرهم هیچ . موسیقی معلیمی دی تبریزده . قادین لارین آختاردیغی بیر کیشی ایدی . دنیزین الینی سیخیرام . بیلیرم عینک سیز گورمز یوزومو . یاواشجا اگیلیب قولاغینا دییره م
_ خوش سفر لرین اولسون عمی !
_ دای گت ساری آت . بو دا موتورومون آچاری . توت آغاجینین آلتیندا . گوتور گت .
مجبورا چیخیرام ایوندن . موتور لا یاوشجا گدیره م . یاغیشین آلتیندا قطاردورور . قیرمیزی گیمیش بیر قادین ماوی شمسیه سیله آشاغی انیر . یوزونو گیزله دیر مندن . دنیزین ایوینه ساری گدیر . یوخ بو گدن قادین سی سی اولاماز !.
۷- Metamorphosis
_ دیب حس لرینله، کیشی لیغینین تا درین‌لیگندن منیمله سویش ساری‌آت!
هپ سویشرکن لوپه‌یله و یا او ژاپونلو کوندالین قادینی‌لا گوزلریمی یوماردیم. يعنی سويشمک قاران ليقدا. قارانليق يعنی بوتون لوق. يعنی قاران ليقين ايچنده قيرميزی بير آخيم. هن هن . قارانليق ايچنده سانکی پيانولاشماق . پيانو... پيانو .... آما آچدیم بو دفعه گوزلریمی.آشاغی یا باخدیم. باشیم دولاندی منیم. آشاغی قارلا دولو داغلار و قورو اوجا، آغ آغاجلار. سویوق یل اسمکده. من هارداییم. کیمینله سویشیره‌م؟ ندن ايسته ديگمله هپ رويالاردا ، ناغيل لاردا ، بولوت لاردا سويشمم گره کير ؟
_ ساری آت هر قادینی الده اتمک ایسترسن اگر، یاخجی جا سویشمن گره‌کیر اونولا. ایستی لن. ایسیت منی .
_ سن کیمسین؟
_ من؟ کیم اولا بیلریم؟
_ سووق یل !من کیمم؟
_ ساری آت ندن سوروشورسان کیم اولدغونو. منیم سویشماق خیالیندا گئجه‌لر گئچیرمیش‌سین. اصلان اول. قیزار. چیغیر. دیش دیش ات جانیمی.
_ سن سی سی می‌سین!
_ سی سینی ایندی گل توت !
اسدی سی سی. یانیمدان اسدی و آشاغیلارا ساری گیتدی. اگر ۲۰ اينجی يوز ايلده اولومون يا دوستون يا سوگيلين يل اولسا بير طورلو يل اولمان گره کير ساری آت. اسگی ناغيل‌لار کيمی . اسدیم دالیسی جان. قیرمیزی ات آرخاسیندا قاچارکن قاچادیم سانکی. سووق یل آغاجلارین داللارینین آراسیندان گئجدی و قار اوستونه ایاق باسارکن دوشان اولدو!
_ ندن دوشان اولدون سی سی ؟
_ دوشانی کیم قووالار آی جن لر پادی‌شاهی؟
_ نه بیلیم ؟ تولکومی؟ قوردمو؟ قافلان‌می؟ اصلان ...
_ اصلان اول ایندی.
ديديم يا . حياتيمين بوراسی سانکی بير ماوی گوگده بير ناغيل اولماقدا. ناغيل ايچينده‌ييم من . اصلان اولمام گره کير دوستوم . اوجا اوجا گولر کن اصلان اولدم. يانيمدان قاطار گئچرکن ، باشيمدان اوچاق اوچارکن تيک تاک تيک تاک اصلان لاشديم من .یوگوردوم. قاچدی. قاچدیم قوالادیم. قار ایچینده آغ دوشان و آرخاسیندا من قیرمیزی اصلان. دوردو. یوگوردوم. توتارکن داشالادی. داش اولدو. گولدو .
- داشلا ناسیل سویشی‌لیر آی ایون ؟
_ دوشون . بوتون ارکک لیغینلا دوشون.
_ من بویله نجور دوشونه بیللم؟
_ دور و واراژ دان سوروش!
بوراسی واراژ می؟ واراژین قاری‌می؟ واراژين داغلاری‌می؟ دوندوم باخا قادیم. قارلا یر سویشیر. گویله آغاجلار. ککلیک لرله سوکوت. زمان لا واراژ شهری . و واراژ هاراسی ؟.
_ هی قوجا واراژ ناسیل سویشیم من بو داشلاشان گوزه‌له ؟
قولاق لاریم سانکی پاتلادی. دوشدوم داشین یانین‌نا. گولدو سی سی. داش گولدو. الله اکبر. ایشته الله اکبر بوردا دییلر. بویله بیر آینادا حیرت لر ایچنده معنا وره‌ر بو الله اکبر . ساری آت اولدوم ینی دن. داشی گوتوروب گویه ساری آتدیم. داش گديب گویه دگدی. گوگون سسی روحومو تیتره تدی. آنلادیم. تامام گوزه لیم. اوی نایان بئله اوینار. ناغيل ديه نين جانی ساق اولسون. دونوشدوم یل ایچره گویه واردیم. بولوشدیم قارا بولوتلارا. اوز اوزومه چاخدیم. ایکی چاخماق داشی چاخار کن ایدلیریم اولدوم. داش یره انه‌ر کن داشا واردیم. داش یوق اولدو. باشیم دولاندی گینه.
_ ایستی له ت منی ای حیرتین تا اوزو!
بیر باخدیم. بولور بوزدان بیر هیکل. سانکی میکل آنژین گیزلی سری. موسیقی ایچیمدن فیشقیردی اشگیه. سانکی واراژ دوروب آغ اوزون پالتاریلا ستایشه گیریشدی. آتشه تاپان بیر مانک کیمی. اوت اولوب آغاجلاری یاخدیم. موسیقی ایچنده واراژین رازو نيازی‌هر یردن اشیدیلدی. داشلاردان. قوشلاردان. اولولرین یاشیل روحلاری دوره له‌دیلر سی سی نین بوزدان هیکلنی .یاندیم. قیزاردیم یاندیم.بوتون بابالاریم قلبیده اویاندیلار. بوتون گئچمیشیم تنیم ده قیرمیزی قان کیمی دیرلدی دولاندی. سانکی بیر شعر اولموشدوم او یزدان آدلی اولونون آغزیندا. او ایتیلمیش گیزیلی سوزلر. دولاشدیم هیکله. یاندیردیم اوتوران لارین آغینی قاراسینی. یاشیل روحلارین آغیزلاری یانیردی. وای گل گور منی آشک نیله دی؟ اریدی سی سی . آه چکدی سی سی . سویشدیم. اونولا. اولدم سویشدیم . کافیر اولدم سویشدیم. ایمان گتیردیم سویشدیم.او اردیدی من دوندوم .
_ ارکه گیم منیم!
_ اولمیشم من!
_ دیریل ساری‌آت دیریل.
قازدیم. بیر دلیک آچدیم . یاغیش یاغیردی . آنامین قارنین دان چیخارکن یردن اشیگه چیخدیم. الیمی توتدو بیریسی . گوزلریمی سیلدی. آریق ، ایری آریق بیریسی. نارنجی بورکلی بيريسی. منيم زامانيما عاييد اولمايان بيريسی. قولاغی توکلو بيريسی
_ کیمسین سن ؟
_ قوجا دوستون زرکوب !
_ منی هاردان تاپدین؟
_ دیزبادانا گتیردی منی بورایا .
_ بورا هارادی ؟
_ بورا سنین غربتیندی . ژيمژاپوليس.
_ من یورقونام .
_ بیلیره م .گل گداق دوستوم . گل گداق دیزبادانانین ایوینه. گل گداق یدی گون یدی گنجه دیاق دانیشاق.
_ یدی گئجه‌می ؟ الله اکبر ..
_ سن اوندان دا بویوک سون!
دیزبادانا. کیم اولور بو دیزبادانا. منی آغ قاییقدا ایستی سویون ایچنه قویوب کوره ک ورا ورا گت دیلر. بیلمیره م دوغروسو اولموشمو یا دیری‌یم و یا بیر اوچونجو آیری ایحتیمال. آنام دمیشکن یکه لریندن باش تاپمارام من !